Mannauðurinn

FISK Seafood er fjölskylduvænn vinnustaður og leggur áherslu á jafnvægi á milli vinnu og einkalífs. Á meðal þess er skipulagning veiðitúra langt fram í tímann og er ekki hvikað frá þeim áætlunum nema í þvinguðum undantekningartilfellum. Þannig leggjum við lóð á vogarskálar þess að sjómenn okkar geti skipulagt fjölskyldulíf sitt og viðburði í einkalífinu án óvissu um úthald hverju sinni. Þegar yfirvinna býðst hefur starfsfólk FISK Seafood val um hvort það nýti slík tækifæri. Yfirvinna stendur öllum innan sama starfs jafnt til boða og er áhersla lögð á það að henni sé deilt jafnt á milli þeirra sem hana vilja þiggja.  

Vellíðan á vinnustað er lykilforsenda góðra vinnubragða og langtímasambands á milli fyrirtækis og starfsfólks. Góður starfsandi hefur mikil áhrif á líðan fólks á vinnustað og ekki síður utan hans. Og við trúum því einlæglega að hann auki einnig framleiðni og um leið verðmætasköpun. Hluti af okkar framlagi til góðrar líðanar er staðgóð næring á vinnustaðnum. Allt starfsfólk hefur aðgang án endurgjalds að heitum mat í hádeginu, auk þess sem hollur og næringarríkur morgunverður og fjölbreyttir millimálsbitar standa þeim til boða á vinnutíma. Við stuðlum að fyrirbyggjandi viðhaldi og bættum aðbúnaði á vinnustað og erum með opið kerfi þar sem einstaklingar geta komið með ábendingar um það sem betur má fara.

Í upphafi ársins 2023 hófum við verkefni tengt heilsueflingu starfsfólks. Við tókum upp heilsustyrki þar sem fólk getur fengið endurgreiddan kostnað við margskonar heilsueflingu, héldum samskiptanámskeið, gáfum vatnsbrúsa til hvatningar um aukna vatnsdrykkju o.fl.  

Alls voru 256 stöðugildi hjá samstæðunni um áramótin 2023/2024. Hlutfall starfsmanna annars vegar til sjós og hins vegar lands breytist um tæp 5% á milli ára þar sem starfsfólki í landi fækkar en sjómönnum fjölgar. Sem fyrr hallar verulega á hlutfall annarra kynja en karla og skýrist það helst af því að nær eingöngu karlar sækja í störf sjómanna hjá félaginu.  Hlutfall karla í starfsmannahópi samstæðunnar er 78%, konur eru 22 % og önnur kyn 0%. Hlutfall karla hefur hækkað jafnt og þétt á síðustu árum þar sem störfum í landi hefur fækkað en fjölgað á sjó.  

Starfsmannahópur samstæðunnar er mjög fjölbreyttur og kemur starfsfólkið okkar frá níu löndum. Erlent vinnuafl sækir meira í almenn fiskvinnslustörf heldur en íslenskt verkafólk. Á myndinni má sjá þróun í fjölda íslenskra og erlendra starfsmanna í fiskvinnslum samstæðunnar.

Allir stjórnendur FISK Seafood samstæðunnar hafa það að leiðarljósi að félagið virðir almenn mannréttindi, gildandi kjarasamninga og önnur lögbundin réttindi. Félagið mismunar ekki starfsfólki út frá kyni, kynhneigð, uppruna eða trú. FISK Seafood hefur einsett sér að óútskýrður launamunur fari ekki yfir 5 % og til að tryggja það hefur félagið haft gilda jafnlaunavottun samkvæmt ÍST85:2012 staðli síðan 2019.

Jafnlaunavottun

Meginreglur í launastefnu FISK Seafood eru:

• Innleiða vottað jafnlaunakerfi sem byggist á jafnlaunastaðlinum ÍST 85:2012, það skjalfest og því viðhaldið. Afla vottunar faggilds aðila og viðhalda slíkri vottun samkvæmt staðli.
• Framkvæma launagreiningu að minnsta kosti einu sinni á ári þar sem borin eru saman jafn verðmæt störf og athugað hvort mælist munur á launum eftir kyni.
• Bregðast við óútskýrðum launamun með stöðugum umbótum og eftirliti.
• Uppfylla skilyrði staðals um innri úttektir og athugun stjórnenda árlega.
• Fylgja viðeigandi lögum, reglum og kjarasamningum sem varða fyrirtækið á hverjum tíma og staðfesta að farið sé að lögum.
   

Starfsmannafélög

Á öllum vinnustöðum er mikilvægt að hafa virk starfsmannafélög. Slík félög eru vettvangur fyrir starfsfólk til að hittast utan vinnutíma og kynnast betur og með persónulegri hætti en ella. FISK Seafood samstæðan styður starfsmannafélögin með ýmsum hætti, m.a. með fjárhagslegri umbun fyrir aðstoð starfsfólks á umhverfis- og sjómannadegi, gluggaþvott í húsnæði fyrirtækisins o.fl. Slík vinna eflir liðsanda á vinnustöðum og þjappar hópnum saman.  

Fræðsla

Á undanförnum árum hefur verið unnið að gerð námsefnis og innleiðingu á rafrænu fræðsluforriti fyrir landvinnsluna á Sauðárkróki. Á árinu var skipt um fræðsluforrit og nú getum við boðið fólki upp á að nota gervigreind til að þýða námsefnið yfir á sitt móðurmál. Þannig komum við aukinni fræðslu til skila og hefur þessari nýjung verið tekið afar vel á meðal starfsfólks hinna ólíku þjóðerna.

Íslenskunám fyrir starfsfólk af erlendum uppruna var tekið á hærra stig. Ákveðið var að halda sérstakt íslenskunámskeið fyrir starfsfólk landvinnslunnar á Sauðákróki og voru starfsfólki greidd yfirvinnulaun fyrir þá tíma sem það mætti. Áður en námskeiðið hófst var haldið stöðumat en þeir sem ekki tóku þátt í stöðumatinu fóru sjálfkrafa í íslensku 1. Úr varð að 31 starfsmaður skráði sig á námskeið og kennt var tvisvar í viku fyrir hvern hóp.

Á árinu var einnig ráðist í að kaupa fyrir alla erlenda starfsmenn appið „Bara tala“ sem er stafrænn íslenskukennari sem byggir á gervigreind og íslenskri máltækni. Námsefnið er unnið eftir samevrópska tungumálarammanum (CEFR).Á árinu fór fram endurmenntun þeirra sem koma að gæðamálum í landvinnslunni á Sauðárkróki og fengum við námskeið í gerð hættugreiningar, ógnarmats og varnarleysismats. 

Sjómenn FISK Seafood sækja sér grunnfræðslu og símenntun til Slysavarnaskóla sjómanna. Á árinu sóttu sjómenn okkar sér fjölbreytta endurmenntun en á meðal námskeiða er öryggisfræðsla sjómanna, sjúkrahjálp í skipum, hóp- og neyðarstjórnun og öryggisfræðsla smábáta. Miðað er við að hver sjómaður sæki sér endurmenntun hjá Slysavarnaskóla sjómanna að minnsta kosti á fimm ára fresti.

Í töflunni hér að neðan má sá dæmi um samantekt fræðslustunda annars vegar hjá sjómönnum FISK Seafood og hins vegar hjá starfsfólki landvinnslunnar á Sauðárkróki.

Öryggismál

Öryggi starfsfólks í vinnu sinni fyrir FISK Seafood er félaginu stöðugt keppikefli. Áhersla er lögð á virkt vinnuverndarstarf sem er sinnt af öryggisfulltrúum og öryggisvörðum. 

Við hvetjum starfsfólk okkar til þess skrá „næstum slys“ og láta vita um bilanir eða það sem betur mætti fara á starfsstöðvum okkar. Hægt er að koma með ábendingar í gegnum skráningaforritið ATVIK sem er notað bæði til sjós og lands. Brugðist er við hvers kyns ábendingum eins fljótt og auðið er.

FISK Seafood er virkur þáttakandi í öryggishópi Samtaka fyrirtækja í sjávarútvegi. 

Slys

Um árabil hefur FISK Seafood notað atvikaskráningakerfi VÍS, ATVIK, og tók meðal annars þátt í þróun á „ATVIK – sjómenn“, sem nú er gagnagrunnur í eigu Rannsóknarnefndar samgönguslysa. Allir starfsmenn eru hvattir til að skrá ábendingar og næstum slys þannig að hægt sé að bregðast við með fyrirbyggjandi aðgerðum. Starfsmönnum er skylt að skrá bæði minniháttarslys og fjarveruslys (meira en einn dagur frá vinnu) og ógn sem þeir verða fyrir við störf hjá félaginu. Starfsfólk getur skráð með snjalltækinu sínu eða í tölvum í sameiginlegum rýmum á starfsstöðvum. Samantekt skráninga á ábendingum og næstum slysum hefur skilað sér í auknum úrbótum á starfsstöðvum og aukinni árvekni og öryggisvitund starfsmanna.

Á árunum 2020-2024 hefur fjarveruslysum í landi fækkað talsvert hjá félaginu auk þess sem minniháttarslysum fækkaði töluvert á milli 2023 og 2024. Í landi eru algengustu fjarveru- og minniháttarslysin ennþá vegna vinnu með handverkfæri, þ.e. að fólk skeri sig eða stingi við snyrtingu á fiski. Starfsfólki eru boðnir tregskerandi hanskar sem dæmin sanna að koma nánast í veg fyrir skurði en virðast máttlitlir gagnvart stungum. Algengustu slysin til sjós má rekja til þess að sjómenn setja sig í aðstæður sem eru ill- eða óviðráðanlegar og eru flestir þeir sem lenda í slysum einstaklingar sem hafa unnið skemur en 5 ár á skipinu þegar slysið verður.

Samfélagið

FISK Seafood, Soffanías Cecilsson og Steinunn veita nærsamfélagi sínu margvíslegan fjárhagslegan stuðning, einkum til íþróttafélaga, björgunarsveita og góðgerðarmála. Íþróttaiðkun barna og unglinga hefur mikið forvarnargildi og sterkir afreksíþróttahópar eða -einstaklingar eru í senn mikilvæg hvatning og fyrirmynd þeirra sem yngri eru. Við höfum lagt ýmsum íþróttagreinum og einstökum deildum þeirra lið með kaupum á búnaði, styrktarauglýsingum og fleiru. Við höfum einnig verið styrktaraðilar einstakra móta og lagt okkar af mörkum með beinum fjárstuðningi við rekstur einstakra afreksíþróttadeilda. 

Árið 2024 afhentu félögin styrki til íþrótta-, góðgerðar- og menningarmála sem skiptust þannig:

Umhverfisdagurinn

Árlegan umhverfisdag FISK Seafood bar upp á 4. maí en þá eru Skagfirðingar hvattir til að mæta á tiltekin svæði til þess að hreinsa rusl úr fjörum, vegköntum og víðar. Umhverfisdagurinn snýst um að taka til hendinni í nærumhverfinu og fegra það með því að fara í skipulagða plokkferð í krafti hópeflisins. Þátttakendur geta ánafnað einhverri íþróttadeild í Skagafirði verðmæti vinnu sinnar og greiddi FISK Seafood viðkomandi deild 12.000 krónur fyrir framlag hvers og eins þátttakanda. Í þetta sinn mættu hvorki meira né minna en 801 einstaklingur á öllum aldri og voru alls hirt upp  tæplega átján tonn af rusli víða um Skagafjörð. Eftir tínsluna hittist hópurinn í húsnæði FISK Seafood þar sem boðið var upp á heita súpu, grillaðar pylsur o.fl. Á þessum fjórum árum sem umhverfisdagurinn hefur verið haldinn hafa alls verið fjarlægð 50 tonn af rusli í Skagafirði. Það munar um minna!

Skóli og atvinnulíf

FISK Seafood leggur sitt af mörkum til tengslanna á milli skóla og atvinnulífs. Á árinu var unnið að gerð námsbrautar í matvælaiðnaði í samstarfi við Fjölbrautaskóla Norðurlands vestra. Áætlað er að setja upp áfanga sem heitir „vinnustaðanám í fiskvinnslu“ sem gefur nemendum framhaldsskólaeiningar. 

Við höfum styrkt nemendur iðngreina við Fjölbrautaskóla Norðurlands vestra til kaupa á vinnufatnaði sem þeir þurfa að verða sér úti um vegna námsins. Við erum þannig þátttakendur í stærra verkefni sem Byko, Hagi og FNV standa fyrir en þar fá allir nemar á fyrsta ári öryggisbúnað að gjöf. 

Nemendur grunnskólans í Varmahlíð stóðu fyrir skemmtilegu verkefni á árinu. Börnin vildu betri leikaðstöðu á skólalóðinni og efndu til skoðanakönnunar á því hvernig leiktæki væru æskilegust. Niðurstaðan var að nemendur vildu m.a. fá myndarlegan kastala og í kjölfarið hófst átak til að fjármagna leiksvæðið. FISK Seafood lagði sitt af mörkum til þessa frábæra verkefnis.

Félagið styrkti mörg önnur verkefni í skólum nærsamfélagsins og má m.a. nefna leiksýningar, maraþon, blaðaútgáfu o.fl.

Innkaup

Félagið leggur áherslu á verslun og viðskipti í heimabyggð og það skiptir því miklu máli að í henni sé öflug þjónusta á ýmsum sviðum. Einnig leggjum við áherslu á að kaupa eins mikið af aðföngum innanlands og frekast er unnt. Árið 2024 voru 99% af aðkeyptum vörum og þjónustu hjá FISK Seafood fengnar í gegnum íslenska birgja og þar af voru 59% allra viðskipta gerð við nærsamfélagið, það er fyrirtæki á Norðurlandi vestra eða á Snæfellsnesi. Hjá Soffaníasi Cecilssyni voru íslenskir birgjar með 99,96% og viðskipti í nærsamfélaginu voru 70,1%.

Sjómannadagurinn

FISK Seafood fagnaði sjómannadeginum að venju og sóttu bæjarbúar heim fjölbreytta dagskrá fyrir börn og fullorðna. Boðið var í skemmtisiglingu um borð í Málmey SK-1 þar sem áhöfnin tók vel á móti gestum. Eftir að komið var í land tók við fjölskyldudagskrá með tilheyrandi skemmtiatriðum og fjölbreyttum veitingum. Um kvöldið var starfsfólki FISK Seafood að venju boðið til kvöldverðar í íþróttahúsinu á Sauðárkróki.  

„Miðað við þau miklu verðmæti sem eru í húfi er það í mínum huga ábyrgðarhluti að skera útgjöld til hafrannsókna jafn mikið niður við trog og raun ber vitni.